சங்கர சுவாமிகளின் அற்புதங்கள்

காமியத் தவம் காமியம் ஒன்றையும் கருதிடாத்தவம் என்றும்பூமியில் தவம் இருவகை சித்தியும் போதமும் தரும் மைந்தா ஆம் இவற்றில் ஒன்றுஇயற்றினார் ஒன்றையே அடைவர் இது தீர்வை யாம் உரைத்த அவ் இரண்டையும்
இயற்றினார் அன்றுள்ள பெரியோரே.
-கைவல்லிய நவநீதம் (சந்தேகம் தெளிதல் படலம் – 45)

தவமோ இருவகையாகும் ஒன்று காமியத்தவம் என்பர் மற்றொன்று நிட்காமியத்தவம் என்பர். காமியத்தவம் என்பது ஒரு பலனைப்பெற விரும்பிச் செய்யும் தவமாகும்.நிட்காமியத்தவம் என்பது ஒரு பலனையும் இச்சியாது செய்யும் தவமாகும். இவற்றில் காமியத்தவம் அட்டமாசித்திகளைத் தரும் நிட்காமியத்தவம் முத்தியை மட்டுமேதரும்,இவற்றில் ஒன்றையியற்றுவோர் ஒன்றையே பெறுவர். ஆனால் பேரான்ம ஆற்றல் பெற்ற ஞானிகள் இருவிதத் தவங்களையும் இயற்றினபடியால் சித்தி, முத்தி

இரண்டையும் அடைந்தார்கள். பேரான்மப் பெரியோரான பரமஞான குருபிரான் ராஜரிஷி அய்யன்பட்டி சங்கரசுவாமிகள் அவர்கள் திருச்சீரலைவாய் (திருச்செந்தூர்) எனும் திருச்செம்பதியில் ஜீவசமாதி ஆலயம் பெற்று அருள் பாலித்து வருகிறார்கள். சங்கரசுவாமிகள் இப்புவியில் தேகசஞ்சாரமும் தேச சஞ்சாரமும் செய்த காலத்தில் நடந்த அற்புதங்கள் பல உள்ளன. அவற்றில் சிலவற்றை மட்டும் இங்கு பதிவு செய்துள்ளோம்.