In Kundalini Gnanam, One teacher, one path, one method, one master, one idea and one pointed faith and sensation all the above make up the secret of success in spiritual life.
இந்த உலகத்தில் ஞானப்பயிற்சி செய்யப் புகும் ஒரு மாணவனை ஞானகுரு ஆட்கொள்ளும் பொழுது அவனைத் தம்மோடு கூடவே மெய்த்தொண்டர் குழாத்துடன் சேர்த்து இணைத்துக் கொள்கிறார். இந்த இணைப்புத்தான் அவனுடைய ஆன்ம வளர்ச்சிக்கு இரவும் பகலும் உறுதுணையாக அமைகிறது. குருநாதர் இவ்வாறு மாணவனை இணைக்கின்ற மெய்தொண்டர் குழாமான ஆதிகுருவான பரமகுருவிலிருந்து தொடங்கி நேர்நின்று உணர்த்துகின்ற குருநாதர் வரை வழிவழியாக விளங்கி வருகின்ற ஞானியர் குழுவாகும்.
இந்த ஞானக் குழுவானது அன்றிலிருந்து இன்று வரை மாறுதலோ, மறைதலோ இல்லாது என்றென்றும் நிலை பெற்று நின்று வருகின்றது. இந்த மெய்த்தொண்டர் குழுவானது ஞானப்பயிற்சியில் ஈடுபடுகிற மாணவனுக்கு அவனுடைய உள் உடம்பில் புகுந்து துணை செய்கின்ற மாபெரும் ஞானத் திருக்கூட்டமாகும். உலக நாடுகள் அனைத்திலும் உள்ள மகான்களும், ஞானிகளும் இந்த திருக்கூட்டத்தை UNSEEN MASTERS (தோன்றாத் துணைவர்கள்) என்றும் INVISIBLE HELPERS (அருவநிலையிலும் வழி நடத்துவோர்) என்றும் அழைக்கிறார்கள். இந்த மெய்த்தொண்டர் குழாத்து ஞானிகள் உருவத்தில் அல்லாது அருவத்தில் நின்று மாணவனுக்கு உதவி செய்கிறார்கள். எல்லா வகையிலும் ஞானம் பயில்கின்ற ஒரு மாணவனை இத்தகைய மெய்த்தொண்டர் குழாத்திலேதான் ஒப்படைக்கிறார்கள். குருமார்களே நேருக்கு நேராக தாங்கள் உதவி செய்வதோடு அருவ நிலையிலும் ஞான உதவியை அந்த மாணவனுக்கு எய்துகின்ற முறையில் அந்த மெய்தொண்டர் குழாத்திலே கூட்டுகிறார்கள் ஞானாசிரியர்கள். இந்த உண்மை ஞானியர் உலகத்தில் வழிவழியாக வழங்கி வருகின்ற ஒரு பெரிய இரகசியமாகும்.
இந்த இரகசியத்தைத்தான் ‘மெய்தொண்டர் குழாம், என்ற சொற்றொடர் உணர்த்துகின்றது என்பது ஞானியர் கருத்தாகும். இந்த அனுபவத்தையும், ஆனந்தத்தையும், அள்ளிப் பருக வாரீர்! வாரீர்!! என உலகஅறிவார்ந்தோர் இயற்கை ஞானசபையும் அழைத்து அரவணைத்துக் கொள்கிறது.