நான் 9 ஆம் ஆண்டு சென்னையில் மருத்துவ மேற்படிப்பு படித்துக் கொண்டு இருக்கும் பொழுது எனது அருட்குருநாதர் மகாகனம் தங்கசுவாமிகள் அவர்களிடம் இருந்து 05/05/1998 அன்று திருவடி தீட்சை அருளப்பெற்றேன். சென்னையில் உள்ள ஞானசபைக் கிளையில் தியான அரங்கத்தில் நடக்கும் சத்சங்கத்திலும் சமாராதனையிலும் கலந்து கொண்டு மன அமைதியும் இன்பத்தையும் வெகுவாக அனுபவித்தேன். எனது பட்டப்படிப்பை முடித்துவிட்டு குருநாதரின் அருளோடு 2007 ஆம் ஆண்டு நெல்லையில் எனது மருத்துவப் பணியை துவங்கினேன். அப்பொழுது நெல்லையில் எனது சக உணர்வாளர்களாக இருந்த மணிகண்டன் அவர்களும் சின்னத்துரை அவர்களும் குருநாதரின் ஆணைக்கு இணங்க எனக்கு பெரும் துணையாக இருந்தார்கள். இந்த காலகட்டத்தில் மருத்துவ விற்பன்னர்கள் மூலம் பல அன்பர்கள் நமது ஞானசபையில் இணைந்தார்கள். மாதம்தோறும் பௌர்ணமி மற்றும் மகம் உடுக்களில் திருச்செந்தூருக்கு சென்று அய்யன்பட்டி சங்கர சுவாமிகளின் சமாதி ஆலயத்தில் நடக்கும் சத்சங்கத்திலும் சமாராதனையிலும் கலந்து கொள்வோம். மற்ற நேரங்களில் தியானத்திலிருந்து விலகி இருப்பதாகவே உணர்ந்தேன். எனவே 2008 ஆம் ஆண்டு குருநாதரிடம் நெல்லையில் ஒரு ஞான சபை இருந்தால் நன்றாக இருக்கும். நாங்களும் தொடர்ந்து பயிற்சி செய்ய வசதியாக இருக்கும் என்று ஒரு விண்ணப்பம் வைத்தோம். குருநாதரும் மகிழ்ச்சியோடு இதற்கு இசைந்தார்கள். வாரம் ஒரு முறை வெள்ளிக்கிழமை அன்று பாளையங்கோட்டையில் உள்ள ராபியா மெடிக்கலில் வைத்து சமாராதனையும் சத்சங்கமும் இனிதே நடைபெற்றது. இந்த காலகட்டத்தில் எனது உயிர் நண்பர் மருத்துவர் சுப கணேஷ் அவர்கள் குருநாதரிடம் திருவடி தீட்சை அருளப்பெற்றார். அன்பு குருநாதரின் அருளால் 2014-15 ஆம் ஆண்டு நெல்லையில் பொன்ரா மல்டி ஸ்பெஷாலிட்டி மருத்துவமனை உருவானது. மருத்துவமனையில் பாண்டியன் அண்ணாச்சி தியானத்திற்காக ஒரு எண்கோணத்தை வடிவமைத்து கொடுத்தார்கள். பிற்காலங்களில் நெல்லை ஞான சபை அந்த எண்கோணத்தில் வைத்து இயங்கிக் கொண்டிருந்தது. இந்த காலகட்டத்தில் மருத்துவர் சுப கணேஷ் அவர்களின் முயற்சியால் மருத்துவர். கிருஷ்ணகுமார் உட்பட பல மருத்துவர்கள் சபையில் இணைந்தார்கள்.