இந்நூல் தஞ்சைமாவட்டத்தில் நன்னிலம் என்னும் நல்லூரில் வாழ்ந்த தாண்டவராய சுவாமிகளால் இன்றைக்கு சுமார் 450 ஆண்டுகளுக்கு முன் எழுதப்பெற்ற அத்வைத இலக்கிய ஞானநூல் ஆகும். இந்நூல் தமிழில் தோன்றிய சுத்த அத்வைத இலக்கியம் என்று சொன்னால் அது மிகையாகாது. இது ஆழ்ந்த நுட்பமான கருத்தோட்டமும் கூடிய நூல் எனதுணிந்து கூறலாம். கைவல்ய நவநீதம் எனும் இந்நூலுக்கு ஆழ்ந்த புலமைபெற்ற சிதம்பரம் பொன்னம்பலம் சுவாமிகள், ஈசூர் சச்சிதானந்த சுவாமிகள், தஞ்சை வடிவேலு செட்டியார் சுவாமிகள், அருணாசல சுவாமிகள் போன்ற ஆன்றோர்கள் பிளாட்டினம் போன்ற குவளைகளிலும், தங்கக் குவளைகளிலும், வெள்ளிக் குவளைகளிலும் இந்த ஞானப்பாலை ஊற்றி, பாதுகாத்து பலரும் பருகும் வண்ணம் செய்தனர். யாமோ எம்மால் இயன்ற அளவு திரட்டி எல்லோர் இல்லங்களிலும் பழக்கத்தில் இருக்கும் எவர்சில்வர் குவளைகளில் சேர்த்து வைத்துள்ளோம். அருளை அள்ளிப் பருக நினைப்போர் அனைவரும் அள்ளிப்பருகி பவசாகரம் கடக்க உதவிடும் புணையாகப் பயன்படுத்திக் கொள்வீர். இந்நூலில் நிறைகளை ஏற்று, குறைகண்டால் உலகம் பொறுக்க.