அந்த கல்வெட்டில் திறப்பு விழா தேதி சில மாதங்களுக்கு முன்னே பொறிக்கப்பட்டு தலைமை சபையில் தயார் நிலையில் வைத்திருப்பது வழக்கம். அதுபோல் மேல்மருவத்தூர் சபைக்கு உண்டான கல்வெட்டை வாங்குவதற்காக குருநாதர், உமரிக்காடு ஞானசபைத் தலைவர் கனம் பொருந்திய முருகேசன் மற்றும் அடியேன் மூவரும் தூத்துக்குடிக்கு சென்றோம். நாங்கள் சென்றது கொரோனா ஊரடங்கு அறிவிப்புக்கு முன்னால் என்பது குறிப்பிடத்தக்கது. வழக்கம் போல் கல்வெட்டில் உள்ள பதிவை வாசித்து பார்த்தேன். திறப்பு விழா பொறிக்கப்பட்டு தேதி மட்டும் பொறிக்கப்படவில்லை. இப்படி எந்த ஞானசபை கல்வெட்டிலும் தேதி குறிப்பிடாமல் இருந்ததில்லையே என நினைத்துக் கொண்டு, அங்கு வைத்தே குருநாதரிடம் ஐயா, தேதி பொறிக்கப்படவில்லையே என கேட்ட போது, குருநாதர் அவர்கள் அன்றைக்கு போவதற்கு எப்படி வாய்ப்பு இருக்கிறதோ தெரியவில்லை, அப்புறம் அங்குள்ள ஆளை வைத்து தேதியை போட்டுக் கொள்ளலாம் என்ன, என்று அவர்கள் பாணியில் சொன்னார்கள். கல்வெட்டைக் காரில் ஏற்றி தலைமை சபையில் கொண்டு சேர்த்தோம். இருந்தாலும் என் ஐயப்பாடு தீரவில்லை. எல்லா சபை கல்வெட்டிலும் முன்கூட்டியே தேதியை பதிவு செய்யும் குருநாதர் ஏன் மேல்மருவத்தூருக்கு மட்டும் முன்கூட்டியே தேதி பதிவு செய்யவில்லை என குழம்பி கொண்டிருந்தேன். பிறகுதான் கொரோனா ஊரடங்கு அறிவிப்பு வருகிறது. ஞானியின் சிறப்பை தாயுமான சுவாமிகள் இவ்வாறு கூறுவார்.
காலமொரு மூன்றுங் கருத்திலுணர்ந் தாலுமதை
ஞாலத் தனக்குரையார் நல்லோர் பராபரமே. – பராபரகண்ணி – 191. அஞ்ஞானிகளுக்கு இறந்த கால நினைவுகளும், நிகழ்கால சம்பவங்களும் மட்டுமே புலப்படும். எதிர்காலம் பற்றி உணரார். ஞானிகள் முக்காலம் உணர்ந்தாலும் குறிப்பாக எதிர்கால விளைவு தெரிந்தாலும் சாட்சியாய் இருப்பார். நடுவான சீவமுத்தர். எதிர்கால நிலை முன்கூட்டியே நமக்கு தெரிந்தால் நிகழ்காலத்தின் சுகம் பறிப்போய் விடும். ஞானிகள் எல்லாவற்றையும் முன்கூட்டியே உணர வல்லவர்கள் என்பதை இச்சம்பவம் வாயிலாக அறிய முடிகிறது. இப்படி எவ்வளவோ சம்பவங்களை கூற முடியும். இருந்தாலும் இவைகளை தாண்டி நாம் காணும் குருநாதர் அடியேன் அனுபவத்தில் கூற வேண்டுமெனில், ஆரம்ப காலங்களில் ஆன்மீக தாகம் கொண்டு அலைந்து திரியும் காலங்களில் நாம் புத்தர் இயேசு, நபிகள் நாயகம், இரமணர், இராம கிருஷ்ணர் பரமஹம்சர் போன்றோர் தேக சஞ்சாரம் செய்த காலங்களில் நாம் பிறக்காமல் போய்விட்டோமே! அப்படி பிறந்திருந்தால் பவ பிணி நீங்கியிருக்குமே, இனி இவர்களுக்கு இணையான குருநாதர்களை ஞான சூரியனை எங்கே தேடுவேன் எப்படி உபதேசம் பெறுவேன் என ஏங்கி தவித்தேன்.