சுவாமிகளுக்கு சிறுவயது முதல் இருந்து வந்த பகுத்தறிவுச் சிந்தனையாலும் ஆய்வுத் திறனாலும் சிவத்தையாபுரத்தைச் சேர்ந்த ஆன்மீகப் பெரியார் என்றழைக்கப்படும் தாடிக்காரர் பெருமாள் நாடார் அவர்களின் தொடர்பு 1969ல் கிடைத்தது. சுவாமிகளின் தீவிரத் தேடலைப் புரிந்து கொண்ட ஆன்மீகப் பெரியார் சுவாமிகளை ஏரல் அருகில் உள்ள சிவகளை என்ற ஊருக்கு அழைத்து சென்று ஆதித்தன்பிள்ளை சுவாமிகளிடம் அறிமுகம் செய்து வைத்தார்கள். (ஆதித்தன்பிள்ளை சுவாமிகள் திருச்செந்தூரில் சமாதி ஆலயம் பெற்றுள்ள ராஜரிஷி அய்யன்பட்டி சங்கர சுவாமிகளின் தலைமாணாக்கர் ஆவார்). சுவாமிகள் தமது குருநாதராகிய ஆதித்தன்பிள்ளை சுவாமிகளிடம் தொடர்ந்து தொடர்பு கொண்டு ஞானக் கருத்துக்களையும் ஆன்மீக நூல்களையும் கசடறக் கற்றறிந்தார்கள். பின் 1972ம் ஆண்டு சிவராத்திரி நாளன்று முறைப்படி குண்டலினி ஞான திருவடி உபதேசம் (தீட்சை) பெற்றார்கள். பின் குருவின் வழிகாட்டுதலுடன் தீவிரபயிற்சியில் ஈடுபட்டார்கள். மெய்வருத்தம் பாரார் பசிநோக்கார் கண்துஞ்சார் எவ்வெவர் தீமையும் மேற்கொள்ளார் -செவ்வி அருமையும் பாரார் அவமதிப்பு கொள்ளார் கருமமே கண்ணாயி னார். என்ற நீதிநெறி விளக்கப் பாடலுக்கேற்ப தீவிர தவவாழ்க்கை மேற்கொண்டு, இறைநிலையை உணர்ந்து பரிபூரண நிலையாகிய சச்சிதானந்தப் பெருநிலையை அடைந்தார்கள்.