அவர்களால் எண்ணற்றோர் பலனடைந்து இருக்கிறார்கள். ஆனால் யாரிடமிருந்து அவர்கள் எவ்வித பலனும் எதிர்பார்ப்பதில்லை. தியானசபை வளர்ச்சியில் பங்காற்றிய தொண்டர்களுக்குக் கூட அதைப் பன்மடங்காகத் திருப்பி வழங்குவதே வழக்கமாகும். ஒவ்வொரு மாதமும் முழுநிலவுத் திருக்கூட்டத்திற்கு அழைப்பிதழைத் தனது கைப்பட எழுதி, யாரையும் எதிர்பார்க்காமல் பெரும்பாலும் தானே மிதிவண்டியில் சென்று தபால் நிலையத்தில் சேர்ப்பிக்கும் பணியையும் தமது 82வயதிலும் தொடர்ந்து செய்துகொண்டிருக்கிறார்கள். இந்த கணினி யுகத்தில் கடிதம் எழுதுவது முற்றிலும் ஒழிந்துவிட்டாலும், தமது மாணவர்களிடம் காட்டும் அன்பின் வெளிப்பாடாகவே இதைத் தொடர்ந்து செய்து வருகிறார்கள். முத்தியை நல்கும் இந்த குண்டலினிஞானப் பயிற்சியினைக் கற்றுக்கொள்வதற்கு ஆயிரத்திற்கும் மேற்பட்ட மாணவர்கள் இணைந்திருப்பினும் அவர்களில் பெரும்பாலோர் உடல் உபாதைகளைப் போக்கிக் கொள்வதற்காகவோ அல்லது குடும்பப் பிரச்சினைகளைத் தீர்ப்பதற்காகவோ குருநாதரை நாடியவர்கள் ஆவர். இருப்பினும் அவர்களின் அல்லலைக் களைந்து அருள்வழிகாட்டி ஆட்கொண்டுள்ளார்கள் என்பதே உண்மை. எனவே இந்த குருகுலத்தில், கல்வியிற்சிறந்து பல்வேறு துறைகளில் கோலோச்சும் அன்பர்கள் முதல் படிப்பறிவற்ற கூலித்தொழிலாளர்கள் வரை பலதரப்பட்ட மாணவர்களைக் காணலாம்.