உலகப் பொதுமறையான திருக்குறள் “பாயிரம்” கடவுள் வாழ்த்தும், வேதாந்த நூலான “கைவல்லிய நவநீதம்” பாயிரம் பாடல்களும் பேரான்ம ஞானிகளின் அருமை பெருமைகளையும் அவர்களைச் சார்ந்து அவர்களின் அருட்பேராற்றலைப் பெற்றவர் மட்டுமே அவர்களைப் போல் பிறப்பிறப்பற்ற பெருநிலையை அடையமுடியும் என்பதையும் “உள்பொருள் உள்வாங்கியது” என்ற இந்நூலில் பதிவு செய்துள்ளோம். நீ இந்த தேகத்திற்கு உள்ளிருக்கும் சீவனை அறிந்துணர்ந்தால் நீயும் சிவமாகி விடுவாய் என்ற சைவ சித்தாந்தம் கூறியதும், நீ ஆசான் மூலம் “பிரம்மத்தை அறிந்துணர்ந்தால் பிரம்மமாகவே ஆகிவிடுவாய்!” என்ற வேதாந்த கருத்தான அத்துவைதானந்த சுகத்தை அடைந்திடலாம் என்பதையும் பதிவு செய்துள்ளோம். அங்கே நாம ரூபமே கிடையாதென்பதால் “நாமரூப நாட்டம் விடின் நமது சொரூபம் தோன்றிவிடும்” என்ற உண்மையை அனுபவத்தில் மட்டுமே அறிந்துணர முடியும் என்பதையும் பதிவு செய்துள்ளோம். பிரம்மத்தை அறிந்துணர பிரம்மஞானம் பெற்றவர் துணை வேண்டும் என்பதையும் ஒரு ஞான தீபத்தில் இருந்துதான் இன்னொரு ஞான தீபத்தை ஏற்ற முடியும் என்பதையும் தெளிவாகக் கூறியுள்ளோம். நீரானது உடலைத் தூயதாக்குவது போன்று பிரம்மஞானம் மனிதனைத் தூயவனாக்குகிறது பிரம்மஞானி தானே பிரம்மம் ஆகிறபடியால் தூய்மை தருதலில் இது தலைச்சிறந்தது பிரம்மஞானம் பெற்றபின் பிறவிப் பெருங்கடலில் அவனுக்கு உண்டாகும் துன்பத்தையெல்லாம் அது துடைத்துத் தள்ளுகிறது ஞானத்தை அடைந்தவனுக்கு தன் சொரூபமாகிய பேரானந்தம் கிட்டுகிறது. மனிதனுக்கு சர்வதுக்க நிவர்த்தி செய்வது பரஞானம். வாயு முதலிய நான்கு பூதங்கள் ஆகாசத்தில் நிலைத்திருந்தாலும் அதில்அவைகள் ஒட்டுவதில்லை. ஒரு மாறுதலையும் உண்டு பண்ணுவதும் இல்லை.