ஒருவனுக்கு தாயும், தந்தையும் இரத்த சம்மந்தப்பட்ட உறவுகள். அவர்கள் இந்தப் பிறவியில் மட்டுமேஉடன் இருப்பார்கள். ஆனால் குரு சீடர் உறவு என்பது பல சன்மங்களாக தொடர்ந்து வந்து என்றும் நிலைத்து இருக்கக் கூடியது. இந்த பிறவியில் அடியேன் எம் குருவின் திருவடிகளை அடைந்திருப்பது மிகவும் மகிழ்ச்சியாக உள்ளது. எந்த தகுதியும் இல்லாத நமக்கு எப்படி குருநாதர் தீட்சை கொடுத்தார் என்று நான் பலமுறை நினைத்ததுண்டு. பின்னாளில் தான் தெரிந்தது, எம் குருவின் சிறப்பே தகுதி இல்லாதவனையும் தகுதி உடையவனாக்கி அவனை உயர்ந்த நிலைக்கு கொண்டு செல்வதுதான் என்று.
குருநாதர் அருளிய பயிற்சி முறைகளை சரியாக செய்து வந்தாலே சீடர்களுக்கு தங்கள் வாழ்வில் கொள்ள வேண்டியது எது? தள்ள வேண்டியது எது? என்பதை நம்முள் அருவமாக இருந்து வெளிச்சம் போட்டு காட்டுவதில் வல்லவர் எம் குருநாதர். உலகியல் வாழ்க்கையில் குழப்பமான சூழ்நிலையில் இருக்கும்போது, நல்ல வழிகாட்டியாக இருந்து சீடர்களை நல்வழிப்படுத்துவார்கள். உடல்நிலை சரியில்லாதபோது சில மருத்துவ குறிப்புகளை கூறி சரி செய்யும் ஆற்றல் கொண்டவர் எம் குருநாதர். திருவாரூரில் திருக்குறள் செம்பொருள் ஆய்வு மன்றம் அமைத்து எமக்கு திருக்குறளின் மீதும், மற்ற தமிழ் நூல்களை ஆய்வு செய்யும் ஆர்வத்தை தூண்டியவர் என்றால் மிகையாகாது.